Verflüemeret! Das chunnt öich chember vor? Aber chöit dir das chly autväterische oder fasch vergässne bärndütsche Wort o richtig lut vorläse u  ubersetze? U heit dir ds ganze Spiublatt fertig, bevor die angere scho holeie? U was isch, we d Mitspieler meh Glück mit de Würfle hei u die fräche Pössle, wo no dörfe Jury sy, bhoupte, was dir säget, syg Chabis?
Mit em luschtige Spiu "Ziberlizäberli" wird es öich u öine Kollege sicher nid längwylig. U när machet dir ono grad öppis füre Kultur- u Spracherhaut.
Das nöiie Gsellschafts-Spiu isch abem Herbscht i de ungerschiedlechschte Läde z choufe.